Hesaplı, aarif hem açık göz bir insan, incä üzlü, cömert, şakacı hem şen, optimist ürekli. Bu adamnan lafa dururkan, duyêrsın ondan hatır hem sıcaklık, annêêrsın, ani onun lafı da, işi dä düşünülmüş, erli erindä, kırnak hem korekt.
Petri Çebotar üüsek kvalifikaţiyalı bir dil ustasıydır gagauzlarda. Geniş hem derin filologiya bilgileri, Allahtan verili becermekleri hem işçi tabeeti Canabisinin yaşamak yolunu öncä belli ettilär. P.Çebotar biliner nicä yazıcı, folklor toplucusu hem bilim aaraştırıcısı, redaktor-korektor, çevirici, literaturacı. Keskin fikiri, sevgiylän dolu incä lirika duyguları, azartlı aaraştırmak havezi, redaktorluk ustalıı hem gözäl gagauz dili doludan açıldılar Canabisinin buncak tiparlı yaratmalarında. P.Çebotarın elindän çıkma kiyatlar hepsi üüsek uurda – sarp interesli içindekileri, uygun hem original temaları. Dolu üreklän var nicä demää, ani gagauz halkının ruh zenginniindä var Çebotarın da gerää gibi leptası yazılı hem tiparlı formada – literatura bakışları, leksikografiya çalışmaları, proza hem poeziya yaratmaları, bilim-popular basımnarı, rusçadan gagauzçaya çevirmeleri, redaktorluk işleri hem cok taa başka izmetlär… Umutlanêrız, ani bunnar da taa diil bitki.
Kuvetli, diri energiyalı, toplu harakterli hem işsiz duramaz adam çok nelär taa var nicä yaratsın hem tipardan çıkarsın. Haliz bu olgun yaşta en produktiv vakıt: adam artık çok geçirmiş da çok biler, yaşamanın filosofiyasını annêêr, saalıı hem yaradıcılık havezi var, eni ideyalar hep fikirinä geler. Büün Çebotar iş birliini götürer çok taraftan: M. Maruneviçin adına Bilim merkezindän dayma konsultaţiya isteerlär, Komrat Devlet Universitetin gagauz filologiya kafedrası telefon açêr, dolaşık bilim gramatika soruşlarını barabar çözmää savaşêrlar, Gagauziya regional bibliotekası sıralarında isteer görmää Canabisini...
Mutluyum, ani var bölä dostum. Sevinerim onun gözäl işlerinä hem çok sıra ondan örnek alêrım: her taraftan soruşa bakmaa da sora kantara koymaa, delikat olmaa, diskusiyayı uzatmamaa… Akıllı insannan işlemää dä kolay, bir zorluunu da taa ilin geçirersin.
Petri Çebotar kısmetli hem zengin bir adam. Kaavi kökleri Haydarda, annaşmak hem birlik kardaşlarınnan-kızkardaşlarınnan, büük senselesi, bir alay dostları, kolegaları onun dayaklarıdır, zenginnidir hem kısmetidir. Arka hem yardımcı Canabisinä olêrlar onun aylesi, sevgili eşi Maşa, üürenik, akıllı, çalışkan oolları Slava hem İgor hem canını yısıdan iki güneşçik Alinoçka hem Löşka.
Pötr Afanasyeviç, kutluca olsun! Saalık, iilik hem bereket!!!
İvanna Bankova,
filologiya doktoru,
gagauz filologiya кafedrası,
Komrat Devlet Universiteti