Konferențiyayı açtı rejisör İvan Patraman:
Bӓn isteerim şüküretmӓӓ hepsini kim pay aldı bu proekttӓ. Herbirin çalışması pek paalıydı. Biz karşı geldik çok türlü zorluklarlan, ama ensedik onnarı da gittik ileri.
Filma sțenariy yarattı anılmış yazıcı hem peetçi Todur Marinoglu:
Benim vardı denemeklerim bu iştӓ. Taa ileri çevirdiydim ana dilimizӓ dialogları spektaklilerӓ deyni, angılarını gösterӓrdilӓr KDU teatru bölümündӓ üürenӓn studentler. Benim önümdӓ durardı bir büük neet- temellenip kısa annatmaya, kurmaa geniş hem dolu olaylarlan sțenariyi. Yardımcı oldular benim bilgilerim istoriya uurunda, çünkü bu filmın olayları geçerlӓr XX-ci asirin 20-çi – 30-çu yıllarında. O zamannarda, açan Besarabiya bulunardı Rumın padişahlıın baskısının altında.
Todur Marinoglu paylaştı, ani aldı kendisinӓ cüvapçılık hem hak diiştirmӓӓ baş kahramannarın ecellerini. Er, Nikolay Babogluya görӓ ‘Dünürcülük’o bir tragediya, eni sțenariya görӓ film - bir drama.
Elbetki, evelki adetlerin hem aylӓ kanonnarın vardı büük dooruluu o zamannarda, da zorlama evlenmӓk diildi bişey sıradan aşırı. Ama, nicӓ da herbir iştӓ, bu adetin da vardı kendi sert tarafları, vardı kurallardan dışarı olaylar. Onnar da açıklêêrlar, ne can acıları çekӓrdilӓr gençlӓr, ne ruh zeetleri onnar duyardılar, açan sevdanın kanatları kesilӓrdilӓr türlü sebeplerӓ görӓ. Bu filmda var adetlerin hem gözӓl tarafları hem da evel cümnӓӓ kanonnarın tragediyası.
Operatorların biri Nikolay Ermişko annattı, ani onnar çok aaradılar o erleri, angılar uygundular çekimnerӓ.
Filmı çektik birkaç küüydӓ: Avdarmada, Beşalmada, Kiriet-Lungada, Kırlannarda. Çalışmamız pek meraklıydı. Bu film verdi kolaylık biz deneyelim kendimizi eni uurda. İşledik çok, savaştık bulmaa topraktan evleri, gözӓl kırları, eskidӓn kalma tırlaları göstermӓӓ deyni evel zamannarı. Çoyu insannar bizӓ kayıl oldular yardımnamaa. Bir adam birkaç saada direklerdӓn telleri çıkardı, çünkü onnar dolaştırardılar işimizi, öbürü verdi kullanalım üklü ot yıvgısını, taa başkası - kolverdi bizi maazasına avşamdan sabaayadan, zerӓ başka ölӓ bir maaza yoktu birerdӓ.
Aktör İliya Hadjı annattı kendi kahramanı için:
İlktӓn siyredicilӓr var nicӓ sansınnar, ani bӓn diilim ii bir kahraman. Ama herbir kahramanın var kendi dooruluu. Benim dooruluum onda, ani istedim kendi ooluma kısmet, ani zorluk çekip, zenginniimi düzdüm.
Kutlamaa işin başa çıkmasınnan rejisöru hem filmın bütün yaradıcılık takımını geldi GHT deputatı Ekaterina Jekova:
Gençlerdӓ açan var ideya, bu pek beni sevindirer. Bölӓ işlӓr gösterelӓr, ani var insannar, angılar diil boşuna gagauz dili hem kulturası için lafederlӓr. Bilerim, ani zordu sizӓ. İsteerim metetmӓӓ rejisöru, o korkmadı alınmaa diil sadӓ bir zaamettӓn, da becerdi toplamaa kendi dolayanında ölӓ kaavi komandayı.
Bütündӓn çekimnӓr geçtilӓr 45 gün. Hepsi çalışmalar, angılar baalı filmın yapılmasınnan sürttülӓr bir buçuk yıl.
Konferențiyada rejisör açıkladı, ani filmin ses rejisöru oldu Dmitriy İovçu, operatorlar Vasiliy Keleş hem Nikolay Ermişko, videoya renk ayırdı hem korekțiya yaptı İvan Garizan. Baş rolleri oynadılar Olesӓ Sobor hem Anatoliy Radulov, başka aktörları teklif ettilӓr Çadır-Lunga hem Komrat teatrularından, bir da aktör geldi Rumıniyadan. Vardı onnar da, kimin zanaatı hiç diil baalı kinoylan hem teatruylan, ama bu olmadı onnara köstek denemӓӓ kendi kuvetlerini aktörculukta.
Filmı ilk kerӓ göstereceklӓr Komrat kasabanın Kultura evindӓ noyabrinin 3-dӓ, 4-dӓ hem 5-dӓ, ondan sora, Gagauziyanın başka kasabalarında hem küüylerindӓ. Bilet paası olacek 50 ley.
www.sabaa.md