Toplumunun avtorların sevinmeliini pay etmää geldilär genç yazıcılar, resimcilär, okuyucular.
Bibiliotekanın başı Vasilisa Tanasoglo urguladı, ani ‘Hakikatın sesi’ gazetası ilerleder gagauz literaturasını, ruhunu, tiparlêêr şiirleri, prozayi, meraklı fikirleeri.
‘Hepsi kendi işini yaparsa, nica Viktor Kopuşçu, dilin da gelecӓӓ olacek’, - notladı V. Tanasoglo.
Toplumun baş-redaktoru Petri Çebоtar annattı, nicä Viktor hem Sergey Kopuşçu başladılar ‘Hakikatın sesi’ gazetasını çıkarmaa.
‘Dualar, din materialları, publițistika, şiirlär hem başka işlär her ay çıkêrlar‚ Hakikatın sesindä’. Bu kiyat ta Viktorun işi. O çalışmasaydı, bu işlar olmayaceydı’, - söledi Çebotar.
Redaktor notladı, ki bu kiyada 12 avtorun yazıları girdi.
Sergey Kopuşçu söledi, ani sponsorların yardımınnan 200 taanӓ kiyat çıktı.
‘Bir payını okullara verecez, birazını avtorlara, birkaç ta Ukrainanın hem Rusiyanın gagauzlarına verelecek’, - ekledi o.
Petri Paşalı notladı Viktorun çalışkannıını hem büük sevdasını kendi halkına.
‘O hererdä aarêêr gagauzların izlerini’, - dedi Paşalı.
Genç peetçi hem kiyadın bir avtoru Elena Mokanu açıkladı Viktoru bir pozitiv genç olan gibi, angısı üüsek uura kaldırêr gagauz literaturasını hem gazetacılıını.
Alla BÜÜK.
Foto V.YANÇOGLO.
