Kazayak küüyündä kilim fabrikasını enidän açmaa plana koydular. Peydalanacȇk 12 iş eri. Kilim fabrikası burada açıldıydı 1978-cii yılda. Ozaman onda 500 kişidän zeedä işlärdi. Ama Sovet birlii daaldıktan sora çorbacılık kapandı. Tertipleri hem maasuz düzenneri sattılar ya da verdilär borçalarlan ödeşmää deyni.  

Yaşayannarın birisi, bu İ.Bıyıklı, kooruyabildi 4 kilim düzenini. Küüyün baş A.Uzun annattı, ani İ.Bıyıklı onnarı enidän kullanmaa isteerlar, ki kilimcilik genä ilerlesin Kazayakta.

“Kendi kuvedinä görä adam eski fabrikanın yapısında kimi odaları tertiplemää hem esba getirmää savaşȇr. Primariya da bu işä kolaylıına görä katılacȇk”, - söledi A.Uzun. Ki nekadar taa tez enidä kilim dokumaa başlamaa, kullanarak erindeki adetleri - kilimnerdä Kazayak küüyün simvollarını dokumaa neetleneerlär.

Kazayakta 4 düzendä kaarä kooruyabildilär yapaa taramak için maşinasını da. Kimi evlerdä naturadan alınma boyalarlan yapaayı boyamaa becererlär. A.Uzun söler, ani lääzımnı kilimcilik için yapaayı insandan satın almaa var nicä.

Ama en ilkin fabrikanın yapısında düzdürtmäk işleri yapılsınnar lääzım. Ama şindiki zaman küyün büdjetindä bunun için para yok. Erindeki kuvetlär koydular netlerinä katılmaa türlü proektlerä, ki bunun için kolaylık bulmaa. Çünkü kilimcilik verecek kolaylık ilerletmää turizmayı küüdä hem eni iş erlerini açmaa yaşayannar için.