• Печать

Saat dokuzdu, açan üüsüzlӓr evindӓ sündürdülӓr şılakları. Dışarda kış denӓrdi kendi kuvedini – sert lüzgӓr saurdardı taa gündüzdӓn yaayan kaarı. Ufacık kaarcaazlar, ilin kelebeklӓr gibi, yalpak dokunardılar pençereyä. Sansın kara-biyaz filmada sokakta şılaklardan kaarcaazların gölgesi pençerӓ setindӓ görünӓrdi.

...Sekiz yaşında Vasicii uyku hiç tutmazdı. Pençerӓ boyunda yatarak, ona taa kolaydı «gecӓ filmini» siiretmää. Elini çıkarıp pamuk yorganın altından, sokak şılaanda koykanın öbür başında gösterӓrdi incecik parmacıklarının gölgesini. Vasicik parmaklarını oynadardı, onnarlan bilӓ gölga dӓ oynardı. Böla oynayarak, Vasinin aklısına geldi anasının taa diil çoktan ona çaldıı türküsü.

Uyu, uyu, olcaazım,

Cancaazımsın sӓn benim

Dışarda kaarlar uçêr,

Baalar ayazdan donêr!

Uyu, uyu, olcaazım,

Cancaazımsın sӓn benim

Ahırlar yulaf dolu

Koltuumda benim uyu!

Vasinin gözlerindӓn boncuk gibi aşlak yaşlar düştülӓr. Sıcak sedefçiklär, iz brakarak, tukurlandılar yanaklarında dudacıklarına dooru. Taa kimsey duymadaan, çocuk elin tersinnän sildi tuzlu yaşlarını, da döndü arkasını pençereyä.

Geçti taa yarım saat. Vasicii uykusuzluk hep zeetlӓrdi. Onunnan barabar da türlü-türlü fikirlӓr, hatırlamaklar.

-Yaarın Eni yıl. Bu yıl bana Ayaz dӓdu gelmeyecek, bilerim. Ama olsaydı gelsin! – düşündü kendi kendinӓ çocucak. - Anamnan buluşmaa ondan isteyeceydim. Bana başka bişey diil lӓӓzım!

Bu fikirdӓ dӓ Vasi uyukladı.

*  *  *

Mamu, mamu! Gitmӓ, mamu, gitmӓ! – başladı baarmaa uşak düşündӓ.

Vasi ba, uyan! Sӓn kendindӓ diilsin mi, ne? Anan seni braktı! Artık bir yıl oldu! – omuzlarından sarsalayarak onbir yaşında bir çocuk uyandırdı Vasicii.

Brakmadı, mamu beni brakmadı! Sauş bendän! O gelecek! Bän bilerim, gelecek!

Hm, gelecekmiş! Biz dӓ senin gibi buna inanardık, ama bunnar hepsi aslı diil. Şansora biz üüsüz olannar! – dedi başka bir çocuk.

Yalan bunnar, yalan! Gelecek o! Mamu gelecek! O mamu!  O yok nasıl gelmesin! – baardı Vasicik, silerӓk yanaklarından yaşlarını.

Sarıp kafasını yastıklan, uşak bütün seslӓn başladı sıralamaa. O saat terbiediciyka Mariya Petrovna geldi.

Tez kalkınız hepsiniz! Burada diil kurort! – baardı  Mariya Petrovna. - Vasi, sӓn dӓ tez kalk! Ne kafanı örtmüşün? Hadi, döşeklerini topla da dışarı!

Vasi taa 2 minut yattı kafasınnan yastık altında. Еnikunu kalktı çetin koykadan, büük adam gibi dooruttu döşeeni, giidi kış rubalarını da çıktı hepsinin ardından.

*  *  *

Eni yıl kutlamakları sabaalıklarda artık geçtilӓr. Bu gün sade mandarinnär hem tatlı su Eni yıl yortusunu belli edeceklӓr. 

Dinnenmӓk odasında mandarinneri paklayıp, hepsi dilimneri hızlı aazlarına atardılar.

Beni mamu üç yıl geeri Eni yıla karşı evӓ aldıydı. Ama taa islӓä almasaydı, - başladı annatmaa Vasicӓӓ on yaşında Marinka. - Eni yıl gecesi onun ikinci kocası sarfoş evӓ geldi. Bir dӓ şişӓ içkiylӓn elindӓydi. Anam ona tez baarmaa başladı «Neredӓ genӓ içtin ba, öküz? Makarki bir avşam ayık olsan, geberecӓä!». Bu laflardan sora onun adamı attı o şişeyi mamunun üstüna. Ama mamu vakıtlan bir tarafa çekildi, da kurtuldu. Şişa sa dooru pençereyä uruldu da kırdı sırçayı. Mamu başladı aalamaa. Bӓn korkudan köşedeki çamın ardında saklandım. Mamuya uramadıı için adamı taa da üfkelendi da tuttu onu saçlarından. Saurdup, attı kapunun yanına. Mamu köşeyӓ kafasını urdu da burnusundan kan akmaa başladı. Bӓn korkudan baarmaa çekettim. Sesimi işittiynӓn, bana hızlandı. «Seni pirelisini ya, bak ona! Baarêr da taa! Benim soframa geldi, döşeemdӓ yattı, o da mamusunu arkaya alacek. Gel burayı, domuzka»,  –  baararak üstümӓ başladı örümӓӓ. Bӓn hızlı çamın öbür tarafından çıktım da mamunun yanına kaçtım. Adamı etişti benim yanıma da sıkı tuttu elimdӓn. «Brak beni, brak! Bu bizim evimiz! Git bizdӓn! Brak bizi!», - başladım bӓn baarmaa. Ozaman onun üfkesi taa çıktı. Elimi okadar sıkı tuttu, ani benim bütün gözlerim karardı. O büük aucunnan açan bana bir şamar patlattı, dedim, ani dişsiz kaldım. Mamu çok düşünmeyerӓk, skemneyi aldı da onun arkasına urdu. Bu, bendӓn brakılıp, mamuya endӓn döndü. Tutup buazından, duvarca yukarı başladı onu kaldırmaa. Mamucuumun gözleri bütün fırladılar. Yanımda telefonu gördüm. Bӓn 112 aldım da yavaşıcık söledim: «Kurtarın bizi!». «Kimsiniz siz! Neredӓnsiniz siz?», – sordular. Bӓn sade etiştirdim demӓӓ: «Kotovski, 5» da attım telefonu erӓ, çünkü bu yabanı duydu, ani bӓn poliţiyaya telefon açtım. Poliţiya 10 minudun içindä gelincä, bu canavar beni dӓ, mamuyu da pala gibi düüdü. Kısmetimizӓ kapu kalmıştı açık, da poliţlär içeri girdilӓr. Bunun ellerini geeri dooru çevirdilӓr da departamenta aldılar. Ozamandan beeri bӓn Eni yılı hiç sevmeerim!

Biz evdӓ her zaman Eni yıla bütün aylӓ hazırlanardık. Mamu imekleri yapardı, biz dӓ bobamnan çamı donadardık, - saklayarak yaşlarını söledi Vasicik da umutlan baktı pençereyä.

*  *  *

Mandarinnärlän tatlı su bitti, artık vakıt uyumaa geldi. Vasi girdi pamuk yorgan altına da yısınmaa deyni sık-sık solumaa çeketti. Açan soluk başladı etmemӓӓ, çıkardı dışanna kafasını. Pençeredän o gördü, nicӓ sessiz kaarcaaz erӓ düşardi, saklayarak izleri. Yavaş lüzgercik Vasinin kulaana salut seslerini getirdi. Ozaman o annadı, Eni Yıl geldi.

Ayaz Dӓdu bu gecӓ gelmeyecek. Mamu da gelmeyecek. Birisi gelmeyecek, - düşündü o.

Sarınıp yorgannan, o erleşti pençerӓ setindӓ. Kendi incecik ellerinnӓn terdän buulanmış pençeredӓ «Beenerim seni, mamu!» yazmaa başladı. O sıcak dudacıkları sıracıın bitkisindӓ bir öpücük braktı. Ansızdan pençerenin uuruna bir biyaz guguş yaklaştı. Erindӓ çırpınıp, bakardı Vasiciin gözlerinӓ. Uşak osaat annadı, ani mamusu onu unutmadı, geldi. Vakıt gidӓrdi, gökü yıldızlardı salütlar, kasabadan işidilärdi şen seslӓr, gülüşlӓr. Ama Vasiylӓn biyaz guguşa hiç bişey engel etmӓrdi biri-birinnӓn lafsız annaşmaa. Vasi sırçada yazardı, guguş ta havada oynardı.

Vasi, sӓn genӓ mi uyumêêrsın? Tez yatasın, zerӓ yaarın Dmitriy Vasilyeviçӓ seni götürecӓm! – baardı terbiediciyka, angısı girdi bakmaa, uyuyêrlar mı uşaklar.

Vasi hızlı sakladı  kafasını yorgan altına. Kapu kapanmasını duyduynan, hemen atladı pençerӓ setinӓ. Ama guguş artık yoktu.

Mamu! Bӓn seni beenerim, mamu! – titirerӓk seslӓn dedi çocucak da genӓ girdi yorgan altına.

Alla BÜÜK.